ஆந்திர மாநில சுற்றுலாத்துறை அமைச்சராக பொறுப்பேற்றுள்ள நடிகை ரோஜாவுக்கு 10 அடி உயர ரோஜா மாலை அணிவித்து ரசிகர்கள் அசத்தலாய் வாழ்த்து தெரிவித்தனர்.
ஆந்திர மாநிலத்தில் முதல்வர் ஜெகன் மோகன் ரெட்டி தலைமையிலான அமைச்சரவை அண்மையில் மாற்றி அமைக்கப்பட்டது. இதில் திரைப்பட நடிகையும், நகரி தொகுதி சட்டமன்ற உறுப்பினருமான ரோஜாவுக்கு சுற்றுலாத்துறை அமைச்சர் பதவி வழங்கப்பட்டது. அமைச்சராக பொறுப்பேற்றுக் கொண்ட நடிகை ரோஜா தமிழகத்திலுள்ள முக்கிய வழிபாட்டுத் தலங்களான திருவண்ணாமலை, காஞ்சிபுரம் பகுதி பிரசித்தி பெற்ற கோவில்களுக்கு சென்று சாமி தரிசனம் செய்தார்.
இந்நிலையில் விஜயவாடாவில் இருந்து விமானம் மூலம் ரேணிகுண்டா வுக்கு நடிகையும் அமைச்சருமான ரோஜா வந்த போது அவருடைய ஆதரவாளர்கள் அவருக்கு சிறப்பான வரவேற்பு அளித்தனர். இருநூறுக்கும் மேற்பட்ட கார்கள் படைசூழ, சொந்தத் தொகுதியான நகரி வந்த நடிகை ரோஜாவுக்கு ரசிகர்கள் 10 அடி உயரத்திலான ரோஜா மாலையை கிரேன் உதவியுடன் அணிவித்து மகிழ்ந்தனர். கூடியிருந்த அவரது ஆதரவாளர்கள் ‘ரோஜா மகளே ராஜகுமாரி, வாழ்கவே’என முழக்கமிட்டனர். -தேனீஸ்வரன் –