குழந்தைப்பருவ மாணவர்களுக்கு வேலைத் திறன் பயிற்சி வழங்கும் திட்டத்தைச் சென்னை மாநகராட்சி கைவிட வேண்டும் என்று, பொதுப் பள்ளிக்கான மாநில மேடை கோரிக்கை விடுத்துள்ளது.
அமைப்பின் பொதுச் செயலாளரும் கல்வியாளருமான திரு. பு.பா.பிரின்ஸ் கஜேந்திரபாபு இது தொடர்பாக விடுத்துள்ள அறிக்கை:
“பள்ளியில் மாணவர்கள் ஓவியம் உள்ளிட்ட நுண் கலைகள் கற்றுக் கொள்ளத் தேவையான ஆசிரியர்கள், இசை, பாடல், நாடகம் உள்ளிட்ட நிகழ் கலைகள் கற்றுக் கொள்ளத் தேவையான ஆசிரியர்கள், விளையாட்டுத் துறையில் உடற்பயிற்சியுடன் கூடிய தடகளம், கால் பந்து, கூடைப்பந்து உள்ளிட்ட குழு விளையாட்டுகள் பயிற்சி மேற்கொள்ள ஆசிரியர்கள், கணினிப் பாடம் கற்றுக் கொள்ள ஆசிரியர்கள் நிரந்தரப் பணியிடத்தில் நியமிக்க வேண்டும் என்ற கோரிக்கை தொடர்ந்து எழுப்பப்படுகிறது. சமமான கற்றல் வாய்ப்புகள் அனைவருக்கும் உருவாக்கித்தர வேண்டும் என்பதே சமச்சீர் கல்வியின் நோக்கம்.
இவற்றைச் செய்ய முன்வருவதற்குப் பதிலாக நிர்பயா நிதியில் பாதுகாப்பான நகரம் திட்டத்தின் கீழ் சித்திரத் தையல் உள்ளிட்ட தையல் வேலைத் திறன் பயிற்சிகளை வழங்க திறன் பயிற்சி வழங்குநரை நியமிக்க ஒப்பந்தப் புள்ளிகள் (tender) சென்னை மாநகராட்சி கோரி உள்ளதாக பத்திரிகைச் செய்திகள் தெரிவிக்கின்றன.
வேலைத் திறன் பயிற்சி எந்த வகையிலும் குழந்தைப் பருவ மாணவர்களுக்கு வழங்கக் கூடாது என்பதைத் தொடர்ந்து வலியுறுத்தி வருகிறோம்.
பிஎம் ஶ்ரீ பள்ளித் திட்டம் உள்ளிட்ட தேசியக் கல்விக் கொள்கை 2020ஐ ஏற்க மறுப்பதற்கான பல காரணங்களில் ஒன்று குழந்தைப் பருவ மாணவர்களுக்கு வேலைத் திறன் பயிற்சி வழங்க வழி வகுத்துள்ளதாகும்.
மாதிரிப் பள்ளிகள் உள்ளிட்ட தேசியக் கல்விக் கொள்கை 2020ன் பல்வேறு கூறுகளைப் பள்ளிக் கல்வித் துறை பல்வேறு பெயர்களில் தமிழ்நாட்டில் மிகவும் பக்குவமாக நடைமுறைப்படுத்தி வருவதின் ஒரு கூறாகவே ‘சித்திர’ தையல் உள்ளிட்ட தையல் வேலைத் திறன் பயிற்சியினைப் பார்க்க வேண்டியுள்ளது.
நிர்பயா நிதி பெண்கள் பாதுகாப்பிற்கான நிதி, பாலின சமத்துவம், பெண்கள் மீது நடத்தப்படும் பல்வேறு வன்கொடுமைகளைத் தடுக்க மேற்கொள்ள வேண்டிய நடவடிக்கைகளுக்கான நிதி. குழந்தைப் பருவ பெண் குழந்தைகளுக்கு சித்திரத்தையல் உள்ளிட்ட தையல் வேலைத் திறன் வழங்குவதன் மூலம் பாதுகாப்பான நகரம் எப்படி உருவாகும் என்பதைப் புரிந்து கொள்ள இயலவில்லை.
பெண் குழந்தைகளுக்கு வேலைத் திறன் பயிற்சி அளித்தால் அவர்கள் ஏதாவது ஒரு வேலை செய்து தங்களைத் தாங்களே பொருளாதார ரீதியாக தற்காத்துக் கொள்வார்கள் என்பதாக பொருள் தரும்படி சென்னை மாநகராட்சியின் நடவடிக்கை அமைந்துள்ளது. பள்ளிக்குப் படிக்க வந்த குழந்தைப் பருவ மாணவர்களை அரைகுறைத் திறன் கொண்ட கூலித் தொழிலாளர்களாக வேலைச் சந்தையில் (Job Market) சிக்க வைக்கும் நடவடிக்கைகளைத் தமிழ்நாடு அரசு ஒருபோதும் அனுமதிக்கக் கூடாது.
சென்னை மாநகராட்சிப் பள்ளிகள் உள்ளிட்ட தமிழ்நாடு அரசுப் பள்ளிகளில் இத்தகைய வேலைத் திறன் பயிற்சி வழங்கும் திட்டங்களைத் தமிழ்நாடு அரசு அனுமதிக்கக் கூடாது என்று பொதுப் பள்ளிக்கான மாநில மேடை கோருகிறது.
வேலைத் திறன் பயிற்சி வழங்கும் திட்டத்தை உடனடியாகக் கைவிட்டு, மாநகராட்சிப் பள்ளிகளில் குழந்தைகளுக்குத் தொடக்க வகுப்பு முதல் பாடத்திற்கு ஒரு ஆசிரியர், வகுப்பிற்கு ஒரு ஆசிரியர், கணினி , உடற்பயிற்சி, நுண்கலை, நிகழ்கலை ஆசிரியர்கள், அலுவல், துப்புரவு மற்றும் பாதுகாப்பு ஊழியர்கள் உள்ளிட்ட பல்வேறு ஊழியர்களை நிரந்தரப் பணியிடத்தில் நியமிக்க சென்னை மாநகராட்சி உள்ளிட்ட உள்ளாட்சி அமைப்புகள் முன்வர வேண்டும்.
மக்களிடம் சொத்துவரி உள்ளிட்ட ஏராளமான வரிகளை வசூலிப்பதுடன் நூலகம் மற்றும் கல்விக்கான சிறப்பு வரிகளையும் (cess) உள்ளாட்சி அமைப்புகள் வசூலிக்கின்றன. வரி வருவாயை நியாயமான முறைகளில் செலவு செய்ய உள்ளாட்சி அமைப்புகள் முன்வர வேண்டும்.
தனியார் நிறுவனங்களுக்கு ஒப்பந்தம் மூலம் பள்ளிச் செயல்பாடுகளை மேற்கொள்ள அனுமதிப்பது நியாயமான அணுகுமுறை அன்று. ஒப்பந்ததாரர்கள் தங்களின் கருத்தை குழந்தைப் பருவ மாணவர்கள் மனதில் விதைக்க வாய்ப்புகள் உண்டு. மாநகராட்சி அல்லது அரசு ஊழியர்களாக ஆசிரியர் உள்ளிட்ட அனைத்து ஊழியர்களையும் நியமிப்பது மட்டுமே குழந்தைகளின் பாதுகாப்பை உறுதிப்படுத்த முடியும்.
சென்னை மாநகராட்சி குழந்தைப் பருவ மாணவர்களுக்கு வேலைத் திறன் பயிற்சி வழங்கும் திட்டத்தைக் கைவிட வேண்டும்.
சமூகநீதியின் அடிப்படையில் சமச்சீராக அனைவருக்கும் கல்வி கிடைப்பதைத் தமிழ்நாடு அரசு உறுதிப் படுத்த வேண்டும் என்று பொதுப் பள்ளிக்கான மாநில மேடை கோருகிறது.
மேலதிக விபரம் பெற : பு. பா. பிரின்ஸ் கஜேந்திரபாபு – spcsstn@gmail.com
(M) 94456 83660-