முன்னாள் போலீஸ் டிஜிபி எஸ்.ஆர்.ஜாங்கிட் சினிமாவில் நடிக்கிறார். ஷரவணசக்தி இயக்கத்தில் மக்கள் செல்வன் விஜய்சேதுபதி கதை வசனத்தில் விரைவில் ரிலீசாகிறது ‘குலசாமி’ திரைப்படம். குலசாமி படத்தின் பர்ஸ்ட்லுக் தற்போது வெளியாகியுள்ளது. பர்ஸ்ட்லுக்கில் பிரபல ஐபிஎஸ் (பணி ஓய்வு) அதிகாரி எஸ்.ஆர்.ஜாங்கிட் யூனிபார்மில் கம்பீரமாக நடந்து வரும் காட்சி வருவதைப் பார்த்து போலீசார் மகிழ்ச்சியை தெரிவித்து வருகின்றனர். சென்னை மாநகரின் கூடுதல் போலீஸ் கமிஷனர், புறநகர் சென்னையின் முதல் போலீஸ் கமிஷனர் ஆகிய பதவிகளில் ஜொலித்த ஜாங்கிட், போலீஸ் டிஜிபி அந்தஸ்து பெற்று காவல் பணியிலிருந்து ஓய்வு பெற்றவர். சென்னையின் கூடுதல் கமிஷனராக ஜாங்கிட் இருந்த போதுதான் தலைநகரில் பிரபல ரவுடிகள் அதிகளவில் ஒடுக்கப்பட்டனர் என்பது குறிப்பிடத்தக்கது. பவாரியா கொள்ளையர்களை பந்தாடிய நடிகர் கார்த்தியின் கதாபாத்திரம் (தீரன் அதிகாரம் ஒன்று) மற்றும் படத்தின் நிஜ தீரன் ஜாங்கிட்டே என்பது படம் வெளியான போது பேசு பொருள் ஆனது. ஜாங்கிட்டின் ஐபிஎஸ் பணி அனுபவம், ‘குலசாமி’ சினிமாவில் பயன்படுத்தப் பட்டுள்ளதா என்பது விரைவில் தெரிந்து விடும்.
– ந.பா.சேதுராமன் –